मजदुर १.
तपाइँ बिहान उठेदेखी
राती नसुतेसम्म
कति छाक हिड्नुहुन्छ?
म त–
एक छाक हिड्छु
था’छैन एकछाकले कति हिडाउँछ
फेरि यस्ता छाक,आएको आयै गर्छन् र पो!
अँ–
यसमा एउटी जहान र एक जोडा
लालाबालाको,हिसाब नगर्नुहोला
किनकी उनीहरु मेरै गोडाले हिड्छन् /
मजदुर २.
घाम चर्क्यो भनेर
घरमै बसेर कहाँ हुन्छ?
चोकतिर ‘मजदुर दिवस’को फ्लेक्स बोर्ड
बोक्ने काम आ’को छ अरे– जानुपर्यो /
मजदुर ३.
एकछिन अगाडि :उहाँ
तिमी अल्ली तलको
म अल्ली माथिको
अन्तर छैन भाई – हामी दुवै मजदुर हौँ
यति भनेर उहाँ सरक्क निस्किनुभयो
–लगत्तै फर्किनुभयो
र मेरो हातमा हरियो नोट थमाईदिनुभयो
एकछिन पछि :म
म अल्ली माथिको
तिमी अल्ली तलको
मेन्यु ल्याऊ भाई
आज,दबाएर दिवस मनाउँछु /
मजदुर ४.
मजदुर भएकैले मजबुर छैन ।
मजबुर भएकैले मजदुर पनि हैन ।
वास्तवमा,
मेरो घाँटीबाट खोले फाँडो छिर्न छाडेपछि
मेरो आङले ‘ब्रान्ड’स्पर्श गर्न चाहेपछि
मेरा कुर्कुच्चामा छिरेको काँडाले
कुर्कुच्चा भन्दा धेरै ‘ईख’ दुखाएपछि
मेरो छिमेकीले माथ्लो तलामा बसेर
चिया सुर्पाएपछि
अर्को दर्जाको मजदुर बन्न
म मजबुर बनेको मात्र हुँ
मजदुरी त मेहिनत हो ।
मेहिनत धर्म हो ।
मजदुरी नगरी म एक दाना पनि किन खाउँ?
खैर– यी दिवस किन आउँछन् ?कसका लागि आउँछन्?
